Þetta er allt að finna á slóðinni islenska.org, en það er lén sem hefur staðið autt í nokkur ár, eða síðan að ég fékk þá hugmynd að ég gæti framleitt stafræna orðabók.

Hugmyndin er að fleiri tól og virkni færist þarna inn með tímanum. Næstu verkefni verða að auka sjálfvirkni á ýmsum hlutum þarna, ss. útgáfu á gagnagrunninum sem á bakvið þetta liggur (þeas. orðabókinni sjálfri). Mig langar t.d. til þess að varpa orðabókinni yfir í stafsetningarorðabækur fyrir OS X, Ispell, Aspell, og Firefox.

Mér fannst þó vera kominn tími til þess að opna fyrir eitthvað af þessu, enda er enginn ávinningur fólginn í því að þetta liggi dögum saman óhreift á einkatölvunni minni.

Verði ykkur að góðu.

Þannig er að áður en ég get opnað fyrir það að hver sem er geti gert breytingar á innihaldinu (eins og stefnan er) þarf það að vera á tæru hvaða eignaréttur er á því sem í orðabókinni er.

Best væri sennilega að gera orðabókina að séreignastofnun og láta allt sem í henni er tilheyra orðabókinni, þannig mætti breyta um leyfi eða skilmála seinna, ef það þyrfti að rýmka þá.

Orðasafnið sem myndast vildi ég samt helst að væri almenningseign íslensku þjóðarinnar.

Er ekki einhver með lögfræðiþekkingu sem er til í að fara yfir þessi lögfræðilegu atriði með mér og hjálpa til við að skrifa lagamálið?

Það er ekki fyrir mig – það er fyrir íslenskt mál og þjóðina alla.